dreams and nightmares
كنت ابغى اكتب العنوان بالعربي بس حسيته ما وصل المعنى اللي انا ابغها على العكس من الانقلزي
هدفي في ذي الحياه مو اني انجز و احقق فلوس و و اصير نفس ما المجتمع راسم ليا ،انا ابغى اكون مقتدره لدرجه احقق الاشياء اللي انا ابغى اسويها زي اني اروح اراقب الطيور نفس ذولاك الكبار اللي كنت اشوفهم في التلفزيون و انا صغيره و الكل كان يقول عنهم ناس ممله ،بس انا افهمهم مره و مستعده اقضي يومي كله و انا اراقب الطيور او الطبيعيه
او اروح اصور وثائقي عن اشياء احبها ،و من مخططاتي لتقاعد هو اني راح افتح شركه تصوير للوثائقيات هنا و انا قلت تصوير بس لاني ما احب الاخراج و ذي هيا النقطه اللي افكر فيها كثر مين راح يخرج افلامي اللي راح اصورها😞
قبل فتره بسيطه انا انتبهت لشغفي في تصوير الناس و الاشياء اللي حولي ،من يومي صغيره و انا معايا كاميرا و كنت اصور الناس اللي حولي في الاعياد و المناسبات لاني احب التقط اللحظه في الصوره ،اذا خطتي الحاليه ما نجحت راح اروح اصور مباني و طبيعه او ناس بشكل عفوي (مب شي جدي نفس زوجات لان ذا الشي من كوابيسي )
انا بشكل عام اخر فتره بديت ما اهتم لايش يبغى مني العالم اصير و بديت اسمع لي انا و انا ايش ابغى اصير ،انا وقفت اجري ورا المجتمع و اراءه لانهم حرفيا مجانين و يمشون على كلام ناس اجن منهم
اما عن كوابيسي او الاشياء اللي ترعبني فانا لو صرت نفس الناس اللي في مجتمعي ما راح اسامح نفسي ابدا ،ما اكره الناس اللي في مجتمعي بس نظرتهم و تفكيرهم للحياه و الناس يخوفني ،ما اتخيل في يوم من الايام اصير افكر و اتكلم في الناس نفسهم، اسوء شي لما تفكر او تحسب انك لقيت احد يفهمك او ما ينقد عليك في جمعتنا ،بس في يوم من الايام ذا الشخص فجاه يقلب نفس البقيه بدون سبب،عشان كذا انا قلت ما راح اسامح نفسي لو صرت نفسهم ،وانا اكرهه الناس اللي تلوم بيئتها و محيطها و جيناتها على كل شي كان هيا ما بيدها شي ،في البعض الظروف افهم بس في الاغلب يكون نتيجه كسل و استسلام ، انت تقدر توقف المجتمع انه ياثر عليك لان انت تختار بايش انت تتاثر و بايش لا
انا اكثر انسانه تنقد في الدنيا بس ذا وصل الموضوع لناس او عن اشياء مالي دخل فيها هنا انا ما اتدخل لان مين انا عشان اقرر اذا ذا الشي صح او غلط ،كل واحد يعيش حياته على حسب معتقداته و افكاره و احنا مو لازم نكون نسخه بعض في كل شي
الحياه بنسبه ليا اكبر من اني اقضيها في مراقبه الناس و انتقادهم ،انا اختار اراقب الطبيعه و الحيوانات و لا اراقب ايش الناس سوت في حياتها
جانتي ذي الفكره و انا اذاكر لاختباري اللي خايفه منه ،بعدين قعدت افكر انا ايش اخاف من بدل ما اواصل المذاكره و الحين انا قاعده اكتب هنا بدال ما اروح اذاكر لان انا عندي اراده و الفكره ذي ممكن انساها لو ما كتبتها الان اما عن المذاكره فسهالات نفس الحياه ،اخر فتره في حياتي شعاري فيها كان سهالات و اللي يصير يصير و انا منتظره نتايج ذي المرحله بكل ترقب
بالمناسبه انا ما ارجع اقرا الكلام اللي اكتبه لاني لو رجعت راح احذفه و ما احب التزم بالقواعد النحويه و الاملائيه لانه مو واجب او عمل جاد انا اكتب لنفسي و لنفسي المستقبليه